XODIM XATOSI TUFAYLI HISOBLANGAN QARZDORLIK BЕKOR QILINDI

G‘uzor tuman iste’molchilar huquqlarini himoya qilish jamiyatiga G‘uzor tumani Xalqobod qishlog‘ida yashovchi fuqaro Jarqin Haydarova shikoyat arizasi bilan murojaat qilib, tuman elektr ta’minoti korxonasi mas’ul xodimlari xizmatidan noroziligini bildirgan.

Qayd etilishicha, iste’molchi nomiga tuman elektr ta’minoti korxonasida 102070071154-sonli abonent raqam ochilgan va 2012 yilning 31 iyulidan “DDS-28” rusumli 824098 zavod raqamli elektr hisoblagich orqali elektr energiyasidan foydalanib, to‘lovlarni o‘z vaqtida amalga oshirib kelgan. Ammo korxona nazoratchisi tomonidan elektr hisoblagich ko‘rsatgichi ortiqcha kiritilishi natijasida fuqaro xonadoniga 2 129 089 so‘m asossiz qarzdordik hisoblanganligidan norozi bo‘lgan va mutaxassislardan ushbu qarzdorlikni hisobdan chiqarishda ko‘mak berishlarini so‘ragan.

Murojaatda keltirilgan holatni bartaraf etish va iste’molchiga amaliy yordam ko‘rsatish maqsadida G‘uzor tuman jamiyati xodimlari ishtirokida o‘rganish ishlari tashkil etildi. Natijada iste’molchi xonadonidagi elektr hisoblagichning oxirgi ko‘rsatgichi 2329 kVt/s ni tashkil etgan bo‘lsada, tuman Majburiy ijro byurosi xodimining o‘z xizmat vazifasiga sovuqqonlik bilan qaraganligi oqibatida hisoblagich ko‘rsatigichi 15370 kVt/s ga oshirib ko‘rsatilgan va 2018 yil 5 mart holatida 2 129 089 so‘m sun’iy qarzdorlik hisoblangani aniqlandi.

Ishda to‘plangan xujjatlarga asoslanib, tuman jamiyati tomonidan iste’molchi manfaatini ko‘zlab dalillarga huquqiy baho berish va arizachining talabini qanoatlantirishlarini so‘rab G‘uzor tuman ma’muriy sudiga da’vo arizasi kiritildi.

Sud qonun talabidan kelib chiqib, shikoyat arizasini qanoatlantirishni lozim topdi va qaror qabul qildi.

Sud qaroriga ko‘ra, arizachi Jarqin Haydarovaning G‘uzor tuman elektr tarmoqlari korxonasi xodimlarining xatti-harakati ustidan bergan shikoyat arizasi qanoatlantirildi. Fuqaro abonent raqamiga hisoblangan qarzdorlik g‘ayriqonuniy deb topildi va Majburiy ijro byurosi G‘uzor tuman bo‘limi hamda G‘uzor tuman elektr ta’minoti korxonasi zimmasiga fuqaro nomiga hisoblangan 2 129 089 so‘m qarzdorlikni bekor qilish majburiyati yuklatilib, G‘uzor tuman Majburiy ijro byurosi xodimi Sh.Qo‘ldoshev hisobidan davlat foydasiga 172 240 so‘m davlat boji undirildi.