28.02.2024
Bag‘dod tumani "Mirzaobod" mahalla fuqarolar yig‘inida yashovchi D.M. O‘zbekiston iste'molchilar huquqlarini himoya qilish jamiyatlari federatsiyasining 1091 qisqa raqamli ishonch telefoniga tuman markazidagi savdo do‘konidan sotib olingan konditsioner talab darajasida ishlamaganidan so‘ng sotuvchiga qaytarilgani, lekin sotuvchi 20 kundan ortiqroq vaqt o‘tgan bo‘lishiga qaramay, masalani hal qilishni paysalga solib kelayotganligi borasida murojaat qoldirgan.
Murojaat tegishliligi bo‘yicha federatsiyaning Bag‘dod tuman jamiyati mutaxassislari tomonidan o‘rganib chiqilishi jarayonida iste'molchining murojaatida bildirilgan vajlar o'z isbotini topdi. Iste'molchi 2023-yilning dekabr oyida 3 yillik kafolat muddati bilan 7 720 000 so‘mga xarid qilingan "Avalon" rusumli konditsionerni joriy yilning yanvar oyida yaxshi ishlamayotganligi sababi bilan sotuvchiga topshirib, undagi nuqsonlarni bartaraf etish, lozim bo‘lsa, uni boshqa sifatlisiga almashtirish talabini qo‘ygan, biroq uning qonuniy talablari qanoatlantirilmagan.
Amaldagi qonunchilikka ko‘ra, sotuvchi tovarda kafolat muddatida topilgan nuqsonlarni iste'molchi tegishli talab qo‘ygan paytdan e'tiboran yigirma kun ichida bepul bartaraf etish choralarini ko‘rishi lozim, aks holda bu huquqiy oqibatlarga, xususan, ushbu muddatlardan o‘tkazib yuborilgan har bir kun uchun tovar narxining bir foizi miqdorida iste'molchiga neustoyka (penya) to‘lashiga ham olib keladi. Murojaatni o‘rganish davomida ushbu holatlar sotuvchiga tushuntirilishi bilan nuqsonli kondisioner boshqa maqbul sifatdagisiga almashtirib berildi.
