Выберите язык
Xarid qilingan texnika kafolat ostida bo‘lsa-da, ayrim hollarda iste’molchilar servis xizmatidan asossiz ravishda rad javobini olishmoqda. Bunday vaziyatda esa qonun iste’molchi tomonida turadi.
Andijon shahri, “Haqiqat” ko‘chasida yashovchi fuqaro Sh.G‘aniyeva shahardagi “O‘zbegim” savdo markazida joylashgan “Idea” savdo do‘konidan noutbuk xarid qilgan. Ammo foydalanishning dastlabki oyidayoq qurilmada texnik nosozlik yuzaga kelgan.
Fuqaro kafolat muddati amal qilayotgan bo‘lishiga qaramay, servis markaziga murojaat qilganida unga kafolatli xizmat ko‘rsatish rad etilgan. Shundan so‘ng u O‘zbekiston iste’molchilar huquqlarini himoya qilish jamiyatlari federatsiyasining 1091 “Ishonch telefoni” orqali murojaat qoldirdi.
Murojaat Andijon shahar jamiyati mutaxassislari tomonidan qonunchilik talablari asosida o‘rganildi. Xizmat ko’rsatuvchi tashkilot hamda mas’ul servis markazi bilan olib borilgan muzokaralar va tushuntirish ishlari natijasida servis markazi o‘z majburiyatini bajardi. Noutbuk kafolat shartlariga muvofiq texnik ko‘rikdan o‘tkazilib, mavjud nosozlik bartaraf etildi.
❗️Agar siz ham xarid qilgan mahsulot yoki ko‘rsatilgan xizmat sifati bo‘yicha muammoga duch kelsangiz, sukut saqlamang. Qonuniy huquqlaringizni himoya qilish uchun 1091 “Ishonch telefoni” orqali murojaat qiling. Har bir murojaat e’tibor bilan o‘rganiladi va qonun doirasida ko‘rib chiqiladi.
Qo‘ng‘irotlik fuqaro I.D bank xizmati bo‘yicha yo‘llagan murojaati e’tibor bilan o‘rganilib, ijobiy yechim topdi.
Voqea qanday boshlangan edi? Fuqaro D.Ibraimova 10 million so‘m miqdorida kredit olish uchun Xalq bankining Qo‘ng‘irot tumani filialiga hujjat topshirgan, biroq bank tomonidan "limit yo‘q" degan javob bilan kredit berilmagan edi. Ushbu masala bo‘yicha fuqaro Qo‘ng‘irot tumani Iste’molchilar huquqlarini himoya qilish jamiyatiga murojaat qilgan.
Natija: Jamiyat aralashganidan so‘ng, fuqaroning murojaati to‘liq ko‘rib chiqilib, 2026-yil 3-iyul kuni 10 million so‘m miqdoridagi kredit ajratish bo‘yicha ijobiy qaror qabul qilindi.
Ushbu voqea fuqarolarning o‘z huquqlarini bilishi va tegishli joylarga o‘z vaqtida murojaat etishi qanchalik muhim ekanligini ko‘rsatadi.
Shumanay tumani "Monshaqli" MFY, Ozodlik ko‘chasida joylashgan yoqilg‘i quyish shoxobchasidagi holat "Tutınıwshı_press" kanalining asosiy nazoratiga tushdi.
Shoxobcha hududida ko‘rsatilayotgan xizmatlar bilan bir qatorda, iste’molchilar uchun yaratilgan "qulayliklar" hayratda qoldiradi.
Ayniqsa, avtomobillarga gaz quyishga kelgan insonlar uchun mo‘ljallangan sanitariya joyi (tualet) shunday holatdaki, ichiga odam kirib bo‘lmaydi. U axlatlarga to‘lib ketgan va gigiyena talablariga umuman javob bermaydi.
Bu — xizmat ko‘rsatuvchi shoxobchalarning iste’molchilarga bo‘lgan haqiqiy munosabatini bildiradi.
Gaz quyishga kelgan odamlar shunday "xizmat" bilan ta’minlanishi kerakmi?
Hurmatli mas’ullar, bu holat qachon yaxshilanadi?
