Iste’molchi foydasiga qaror qabul qilindi

Denov shahar “Buyuk kelajak” mahallasida istiqomat qiluvchi fuqaro A.G. joriy yilning fevral oyida “Emiran bozor” hududida joylashgan telefon savdo do‘konlaridan biridan 3 oy muddatga onlayn to‘lov asosida 1 500 000 (bir million besh yuz ming) so‘m evaziga planshet xarid qilgan.

Fuqaro qurilmani uy sharoitida foydalanib ko‘rganida planshetning juda sekin ishlashi sababli undan norozi bo‘lgan hamda muammoni bartaraf etish maqsadida savdo do‘koni ma’muriyatiga murojaat qilgan. Biroq masalaga o‘z vaqtida yechim topilmagan.

Shundan so‘ng fuqaro 13-fevral kuni Iste’molchilar huquqlarini himoya qilish jamiyatining 📞 1091 ishonch telefoniga murojaat qilib, amaliy yordam so‘ragan.

Mazkur murojaat belgilangan tartibda Denov tuman Iste’molchilar huquqlarini himoya qilish jamiyati xodimlari tomonidan atroflicha o‘rganildi. O‘rganish natijalariga ko‘ra, iste’molchining huquqlari qonun doirasida himoya qilinib, nosoz planshet uchun to‘langan 1 500 000 so‘m mablag‘ fuqaro foydasiga to‘liq qaytarib berilishi ta’minlandi.

Namanganda qariyb 17 milliard so‘m iste’molchilar foydasiga qayta hisob-kitob qilindi

Ma’lum qilinishicha, hisobot davrida viloyatdagi iste’molchilar huquqlarini himoya qilish jamiyatlariga jami 1 253 ta murojaat kelib tushgan. Shundan 298 tasi yozma, 955 tasi og‘zaki bo‘lib, 288 ta murojaat elektron shaklda yuborilgan. Barcha murojaatlar belgilangan tartibda ko‘rib chiqilib, tegishli choralar ko‘rilgan.

Hududiy birlashma hamda tuman (shahar) jamiyatlari tomonidan murojaatlar sohalar kesimida o‘rganilib, iste’molchilar manfaatlariga yetkazilgan 16 milliard 921 million 691 ming 836 so‘m miqdoridagi moddiy va ma’naviy zarar qayta hisob-kitob qilinib, iste’molchilar foydasiga undirib berilishi ta’minlandi.

Mebel do‘konidagi muammo ijobiy yakunlandi

Xorazm viloyati Yangiariq tumani “Shirsholi” mahallasida istiqomat qiluvchi fuqaro T. P. tomonidan Xiva shahrida faoliyat yuritayotgan mebel do‘konidan qiymati 5 million 600 ming so‘mlik yumshoq mebel jamlanmasiga buyurtma qilindi.

Buyurtma berilgan mahsulot belgilangan vaqtda iste’molchi xonadoniga yetkazib berildi, biroq mahsulotning sifatiga iste’molchi qoniqish hosil qilmadi.

Mazkur Fuqaro yetkazilgan mahsulot yuzasidan do‘kon xodimlariga bir necha bor murojaat qilingan, ammo mebel jamlanmasi almashtirib berilmagan.

Shundan so‘ng, iste’molchi o‘zining huquqlarini tiklash maqsadida, O‘zbekiston iste’molchilar huquqlarini himoya qilish jamiyatlari Federatsiyasining Yangiariq tuman jamiyatiga murojaat yo‘llagan.

Jamiyat mutaxassislari tomonidan ushbu murojaatni o‘rganish jarayonida do‘kon ma’muriyati bilan tegishli tartibada tushuntirish ishlari olib borildi. Natijada, mahsulot yangisiga almashtirilib, iste’molchining xonadoniga yetkazib berildi.