Iste’molchilar huquqlarini himoya qilish tizimida har bir holatni o‘z vaqtida va xolis o‘rganish, mavjud muammoning sabablarini aniqlash hamda iste’molchining qonuniy manfaatlarini tiklash muhim ahamiyat kasb etadi. Denov tumanida maishiy texnika bilan bog‘liq navbatdagi holatning ijobiy hal etilishi ham bu boradagi amaliy ishlarning muayyan natijasini ko‘rsatdi.
Denov tumani Yangiobod mahallasida istiqomat qiluvchi iste’molchi savdo do‘konidan 6 million so‘m qiymatidagi muzlatgich xarid qilgan. Dastlab foydalanishga topshirilgan maishiy texnikada ma’lum muddat o‘tgach texnik nosozlik yuzaga kelib, muzlatgich o‘z vazifasini talab darajasida bajarmay qolgan.
Maishiy texnikadagi bunday nuqson, avvalo, iste’molchining kundalik turmush sharoitiga bevosita ta’sir ko‘rsatadi. Ayniqsa, muzlatgich kabi doimiy foydalaniladigan texnikaning nosoz holatga kelishi oziq-ovqat mahsulotlarini saqlash bilan bog‘liq qo‘shimcha noqulayliklar va moddiy yo‘qotishlar xavfini yuzaga keltirishi mumkin.
Mazkur holat bo'yicha fuqaro Denov tuman Iste’molchilar huquqlarini himoya qilish jamiyatiga murojaat qildi va xodimlar tomonidan atroflicha o‘rganildi. Jamiyat mutaxassislari iste’molchi tomonidan bildirilgan vajlarni tahlil qilib, muzlatgichning texnik holatini aniqlash va mavjud kamchilikni bartaraf etish bo‘yicha amaliy choralarni ko‘rdi.
Xususan, iste’molchining bevosita ishtirokida maishiy texnika servis xizmati mutaxassislari tomonidan ko‘zdan kechirildi. Texnik tekshiruv davomida muzlatgichda nuqson mavjudligi aniqlanib, tegishli ta’mirlash ishlari amalga oshirildi.
Ko‘rilgan choralar natijasida 6 million so‘mlik muzlatgichdagi texnik nosozlik to‘liq bartaraf etildi va maishiy texnika foydalanishga yaroqli holatga keltirildi. Shu tariqa, iste’molchining qonuniy manfaatlari amalda ta’minlandi.
Mazkur holatni tahlil qiladigan bo‘lsak, iste’molchi huquqlarini himoya qilishda muammoni faqat qayd etishning o‘zi yetarli emas. Asosiy mezon — masalani amaliy jihatdan hal etish, iste’molchiga yetkazilgan noqulaylikni imkon qadar bartaraf qilish va uning manfaatlarini tiklashdan iborat.
E’tiborlisi, masalaning ijobiy yechim topganidan mamnun bo‘lgan iste’molchi Denov tuman Iste’molchilar huquqlarini himoya qilish jamiyati jamoasiga o‘z minnatdorligini bildirib, tashakkurnoma yozib qoldirdi. Unda masalaga o‘z vaqtida e’tibor qaratilgani, amaliy yordam ko‘rsatilgani va muammo ijobiy hal etilgani alohida e’tirof etilgan.
Bu kabi natijalar iste’molchilar bilan ishlashda tezkorlik, xolislik va mas’uliyatli yondashuv muhim ekanini yana bir bor tasdiqlaydi. Iste’molchining ishonchini qozonish esa, avvalo, uning muammosiga befarq bo‘lmaslik va huquqlarini amaliy himoya qilish bilan belgilanadi.
Denov tuman Iste’molchilar huquqlarini himoya qilish jamiyati tomonidan amalga oshirilgan ushbu ish ham iste’molchilar manfaatlarini ta’minlash, muammolarni amaliy yechimga yo‘naltirish va aholining huquqiy manfaatlarini himoya qilish borasidagi tizimli faoliyatning navbatdagi ijobiy natijasi bo‘ldi.
Sizning ham iste’molchi sifatidagi huquqlaringiz buzildimi?
1091 qisqa raqamiga qo‘ng‘iroq qiling!
O‘zbekiston iste’molchilar huquqlarini himoya qilish jamiyatlari federatsiyasi
Surxondaryo viloyati hududiy birlashmasi Axborot xizmati
