Iste’molchilarning huquq va manfaatlarini himoya qilish, murojaatlar bilan ishlash tizimini takomillashtirish bugungi kunning dolzarb vazifalaridan biri bo‘lib qolmoqda.
Shu maqsadda, O‘zbekiston iste’molchilar huquqlarini himoya qilish jamiyatlari federatsiyasi tomonidan joylarda o‘rganish ishlari muntazam ravishda olib borilmoqda.
Kuni kecha Federatsiya raisi o‘rinbosari – ijrochi direktor Jamshid Hamroyev xizmat safari bilan Navoiy, Samarqand va Jizzax viloyatlarida bo‘ldi.
Safar davomida asosiy e’tibor hududiy birlashma faoliyati, xususan, aholidan kelib tushayotgan murojaatlarning ko‘rib chiqilish sifati va tezkorligiga qaratildi.
Viloyatning tuman va shahrida o‘tkazilgan tahliliy jarayonlarda fuqarolar manfaatlarini ta’minlash, murojaatlarni qonun doirasida va o‘z vaqtida hal etish holatlari ko‘zdan kechirildi.
Ta’kidlanganidek, har bir murojaat ortida inson taqdiri va uning qonuniy haq-huquqlari yotibdi.
Savdo markazidagi o‘rganish:
Tadbirkorga tavsiya, iste’molchiga himoya
Xizmat safari shunchaki rasmiy uchrashuvlar bilan cheklanib qolgani yo‘q.
Iste’molchilardan kelgan aniq bir murojaat asosida Jizzax shahridagi yirik savdo markazlaridan birida amaliy o‘rganish o‘tkazildi.
O‘rganish davomida tadbirkorga xaridorlarning huquqlari, tovarlarni qaytarish yoki almashtirish tartiblari hamda amaldagi qonunchilik talablari yuzasidan batafsil tushuntirishlar berildi. Bu kabi tadbirlar nafaqat muammoni hal etish, balki tadbirkorlik sub’ektlarida iste’molchi huquqlariga hurmat madaniyatini shakllantirishga ham xizmat qiladi.
Samara va natija
Safar yakunida viloyat hududiy birlashmasi xodimlariga ish samaradorligini oshirish, aholi bilan muloqotni kuchaytirish va zamonaviy axborot texnologiyalaridan foydalangan holda murojaatlar bilan ishlashni soddalashtirish bo‘yicha tegishli tavsiyalar berildi.
Iste’molchi huquqlarini himoya qilish borasidagi bunday amaliy tadbirlar viloyat bo‘ylab davom etmoqda.
