2026-yil 13-oktabr kuni O‘zbekiston iste’molchilar huquqlarini himoya qilish jamiyatlari federatsiyasi Shofirkon tuman jamiyatining hisobot yig‘ilishi bo‘lib o‘tdi. Mas’ul xodimlar, tayanch guruhlari vakillari va faol a’zolar ishtirok etgan tadbirga alohida tayyorgarlik ko‘rildi.
Yig‘ilishda tuman jamiyatining so‘nggi besh yillik faoliyati atroflicha sarhisob qilindi. Fuqarolar murojaatlari bilan ishlash, iste’molchilarning qonuniy huquq va manfaatlarini himoya qilish, aholiga huquqiy maslahat berish hamda iste’mol madaniyatini yuksaltirish yo‘nalishlaridagi ishlar muhokama etildi.
Ishtirokchilar savdo, umumiy ovqatlanish, kommunal xizmatlar, transport, aloqa va bank-moliya sohalarida iste’molchilar duch kelayotgan masalalarga ham to‘xtaldilar. Murojaatlarga o‘z vaqtida munosabat bildirish, aniqlangan muammolarga amaliy yechim topish va qonunbuzilishlarning oldini olishda tegishli tashkilotlar bilan hamkorlikni kuchaytirish yuzasidan fikr almashildi.
Mahallalarda aholi bilan bevosita muloqot olib borayotgan tayanch guruhlari va faol a’zolarning o‘rni alohida ta’kidlandi. Sayyor qabullar, ochiq muloqotlar hamda huquqiy tushuntirish tadbirlarini kengaytirish, fuqarolar ko‘targan masalalarni izchil o‘rganish bo‘yicha takliflar bildirildi.
Yig‘ilishda Shofirkon tuman jamiyati raisini qayta saylash masalasi belgilangan tartibda ko‘rib chiqildi. Nomzod yuzasidan ishtirokchilarning fikrlari tinglanib, ochiq muhokama va ovoz berish natijasiga ko‘ra tegishli qaror qabul qilindi. Shuningdek, hududiy birlashmaning navbatdagi konferensiyasida tuman jamiyati nomidan qatnashadigan delegatlar saylandi. Ularga iste’molchilarni qiynayotgan masalalar va ularning yechimiga doir takliflarni konferensiyada ilgari surish vazifasi belgilandi.
Samimiy muloqot va kuy-qo‘shiqlar uyg‘unligida o‘tgan tadbir yakunida murojaatlar bilan ishlash samaradorligini oshirish, tayanch guruhlari faoliyatini kuchaytirish hamda aholi bilan aloqalarni yanada kengaytirishga qaratilgan vazifalar belgilab olindi.
