Sariosiyo tumanida chiqindi xizmati uchun amalga oshirilgan to‘lovning boshqa abonent raqamiga o'tib ketgani bilan bog‘liq holat yuzasidan kelib tushgan murojaat o‘rganilib, iste’molchining qonuniy manfaatlarini himoya qilish bo‘yicha amaliy yordam ko‘rsatildi.
Sariosiyo tumani “Aeroport” mahallasida yashovchi fuqaro tuman Iste’molchilar huquqlarini himoya qilish jamiyatiga og‘zaki murojaat qilib, chiqindi xizmati uchun to‘lagan 200 000 so‘m mablag‘i xatolik sababli boshqa abonent raqamiga tushib ketganini bildirgan hamda ushbu masalada amaliy yordam so‘ragan.
Mazkur murojaat Sariosiyo tuman Iste’molchilar huquqlarini himoya qilish jamiyati tomonidan belgilangan tartibda qabul qilinib, jamiyatning huquqiy himoya va murojaatlar bilan ishlash bo‘yicha inspektori hamda xizmat ko‘rsatuvchi tashkilot vakili ishtirokida atroflicha o‘rganib chiqildi.
O‘rganish jarayonida iste’molchi tomonidan ko‘rsatilgan holatlar, to‘lov bilan bog‘liq ma’lumotlar, abonent hisoblari hamda xizmat ko‘rsatuvchi korxona hujjatlari tahlil qilindi. Aniqlanishicha, fuqaro tomonidan chiqindi xizmati uchun to‘langan 200 000 so‘m mablag‘ texnik yoki hisob-kitobdagi xatolik sababli boshqa abonent hisobiga tushib qolgan.
Jamiyat mutaxassislari tomonidan xizmat ko‘rsatuvchi tashkilot mas’ullari bilan birgalikda tegishli tushuntirish va amaliy choralar ko‘rildi. Natijada xato tushgan mablag‘ qayta ko‘rib chiqilib, iste’molchining o‘z abonent raqamiga 200 000 so‘m pul mablag‘i qayta o‘tkazib berildi.
Shu tariqa, murojaatda ko‘rsatilgan masala iste’molchi foydasiga ijobiy hal etildi va fuqaroning qonuniy manfaati tiklandi.
Mazkur holat kommunal va maishiy xizmatlar uchun to‘lovlarni amalga oshirishda abonent raqami, to‘lov rekvizitlari va hisob ma’lumotlarini sinchkovlik bilan tekshirish zarurligini yana bir bor ko‘rsatadi. Chunki ayrim holatlarda kichik texnik xatolar ham iste’molchi uchun ortiqcha vaqt va noqulaylik tug‘dirishi mumkin.
Shuningdek, iste’molchilar shuni unutmasligi kerakki, to‘lovlar, xizmatlar yoki hisob-kitoblar bilan bog‘liq nizoli holatlarda ular tegishli tartibda murojaat qilish, holatni o‘rganishni talab etish va o‘z huquq hamda manfaatlarini himoya qildirish huquqiga ega.
Sariosiyo tuman Iste’molchilar huquqlarini himoya qilish jamiyati tomonidan fuqarolarning og‘zaki va yozma murojaatlarini o‘z vaqtida ko‘rib chiqish, ularning qonuniy huquq va manfaatlarini himoya qilish hamda turli sohalarda yuzaga kelayotgan nizoli masalalarga qonuniy yechim topish borasidagi ishlar izchil davom ettirilmoqda.
O‘zbekiston iste’molchilar huquqlarini himoya qilish jamiyatlari federatsiyasi
Surxondaryo viloyati hududiy birlashmasi Axborot xizmati
