Boysun tumanida fuqaroning sifatsiz oyoq kiyim yuzasidan murojaati o‘rganildi
Iste’molchilarning huquq va qonuniy manfaatlarini himoya qilish, ularning murojaatlarini o‘z vaqtida o‘rganish hamda yuzaga kelgan masalalar bo‘yicha amaliy tushuntirishlar berish borasida Boysun tuman iste’molchilar huquqlarini himoya qilish jamiyati tomonidan tegishli ishlar olib borilmoqda.
Boysun tumani “Kosiblar” mahallasida yashovchi fuqaro Bahodirov Jo‘rabek 2026-yil 21-sentabr kuni jamiyatga murojaat qilib, Boysun bozori hududida joylashgan aralash mollar savdo do‘konidan 500 000 so‘mga o‘g‘il bolalar oyoq kiyimi (poyabzal) xarid qilgani va mahsulot sifatsiz chiqqani yuzasidan murojaat qilgan.
Fuqaro xarid qilgan mahsulotini savdo do‘koniga qaytarib olishni so‘ragan, biroq murojaatida ushbu talabi e’tiborsiz qoldirilganini bildirgan. Mazkur murojaat Boysun tuman iste’molchilar huquqlarini himoya qilish jamiyati tomonidan o‘rganildi.
O‘rganish davomida iste’molchiga xarid qilingan mahsulotni sifatiga ko‘ra almashtirish yoki mahsulot uchun to‘langan pul mablag‘ini qaytarib olish imkoniyati mavjudligi tushuntirildi. Shuningdek, savdo do‘koni xodimiga O‘zbekiston Respublikasining iste’molchilar huquqlarini himoya qilish to‘g‘risidagi qonunchiligi talablari hamda iste’molchining huquqlari haqida ma’lumot berildi.
2026-yil 25-sentabr kuni o‘tkazilgan suhbat yakunida fuqaro murojaati yuzasidan o‘tkazilgan o‘rganish va berilgan tushuntirishlardan qanoat hosil qilganini bildirgan.
Mazkur holat iste’molchilarning o‘z huquqlarini bilishi, xarid qilingan mahsulot sifati bilan bog‘liq muammo yuzaga kelganda qonuniy talablarini bildira olishi muhimligini ko‘rsatadi.
Iste’molchi huquqi — qonun himoyasida! Fuqarolarning murojaatlarini o‘rganish, ularga huquqiy tushuntirish berish va iste’molchilarning qonuniy manfaatlarini ta’minlash borasidagi ishlar izchil davom ettirilmoqda.
