Aholiga ko‘rsatilayotgan tibbiy xizmatlar sifati va shaffofligini oshirish, bemorlarning huquq va qonuniy manfaatlarini ta'minlashga qaratilgan jamoatchilik monitoringlari bilan bir qatorda, tibbiyot muassasalarida huquqiy-ma'rifiy tadbirlar ham tashkil etilmoqda. Bunday tadbirlar orqali amaldagi qonunchilik talablarini keng targ‘ib qilish, tibbiyot xodimlarining huquqiy xabardorligini oshirish hamda iste'molchilarga sifatli xizmat ko‘rsatish madaniyatini yuksaltirish maqsad qilingan.
Farg‘ona shahri
Farg‘ona shahar iste'molchilar huquqlarini himoya qilish jamiyati tashabbusi bilan Farg‘ona viloyati perinatal markazida o‘tkazilgan jamoatchilik monitoringi yakunlari yuzasidan tibbiyot muassasasi rahbariyati va mas'ul xodimlari ishtirokida davra suhbati tashkil etildi. Unda monitoringlarning asosiy maqsadi tibbiyot muassasalarini tekshirish emas, balki aholiga ko‘rsatilayotgan tibbiy xizmatlar sifati, ochiqligi va qulayligini baholash, bemorlar manfaatlarini ta'minlash hamda mavjud muammolarni aniqlab, ularni bartaraf etish yuzasidan amaliy takliflar ishlab chiqishdan iborat ekani ta'kidlandi.
Davra suhbati davomida tibbiyot muassasalarida bemorlarga yaratilgan shart-sharoitlar, ularning o‘z huquqlaridan xabardorligi, pullik va bepul xizmatlar haqida axborot olish, murojaat va shikoyat qilish mexanizmlaridan foydalanish kabi masalalar yuzasidan fikr almashildi. Shuningdek, amaldagi qonunchilik talablariga rioya etish, bemorlar bilan muomala madaniyatini yanada yuksaltirish hamda tibbiy xizmatlarni sifatli va shaffof tashkil etishda jamoatchilik nazoratining ahamiyati xususida tushuntirishlar berildi.
Beshariq tumani
Shu kabi ma'rifiy ishlar Beshariq tumanida ham izchil davom ettirilmoqda. Tuman iste'molchilar huquqlarini himoya qilish jamiyati tashabbusi bilan hududdagi oilaviy poliklinikalarda o‘tkazilayotgan o‘rganishlar doirasida tibbiyot xodimlari ishtirokida amaldagi qonunchilik targ‘ibotiga qaratilgan tadbirlar tashkil etilmoqda. Ularda aholiga ko‘rsatilayotgan tibbiy xizmatlar sifati va ochiqligini ta'minlash, bemorlar huquq va manfaatlariga daxldor qonunchilik talablariga qat'iy rioya qilish masalalariga alohida e'tibor qaratilmoqda.
Ma'rifiy tadbirlarda tibbiyot xodimlariga iste'molchilarning huquqlarini himoya qilish sohasidagi qonunchilik mazmun-mohiyati, tibbiy xizmatlar ko‘rsatishda iste'molchilarning axborot olish huquqi, murojaatlarni ko‘rib chiqish tartibi hamda xizmat sifati va muomala madaniyatiga qo‘yiladigan talablar yuzasidan tushuntirishlar berilmoqda. Bunday uchrashuv va davra suhbatlari o‘tkazilayotgan monitoring tadbirlarini ma'rifiy jihatdan to‘ldirib, tibbiyot muassasalarida aholiga yanada sifatli, ochiq va qulay xizmat ko‘rsatilishini ta'minlashga xizmat qilmoqda.
