“O‘zbekiston Respublikasi Mustaqilligining 35 yilligi” esdalik nishoni o‘z egalariga tantanali ravishda topshirildi
Mustaqillik — milliy o‘zlik, erkin va farovon hayot, xalqimizning buyuk kelajakka bo‘lgan qat’iy ishonchi va ezgu intilishlarini o‘zida mujassam etgan bebaho ne’matdir.
Yurtimiz hayotida alohida tarixiy va ma’naviy ahamiyatga ega bo‘lgan O‘zbekiston Respublikasi Mustaqilligining 35 yillik shonli sanasi yuksak tantana va katta quvonch bilan nishonlanmoqda.
Ushbu qutlug‘ sana munosabati bilan mamlakatimizning ijtimoiy-iqtisodiy, siyosiy, ma’naviy-ma’rifiy va boshqa sohalarida samarali faoliyat olib borayotgan, Vatanimiz taraqqiyoti va xalqimiz farovonligiga munosib hissa qo‘shayotgan yurtdoshlarimizning fidokorona mehnati, tashabbuskorligi va jamoatchilik faoliyati alohida e’tirof etilmoqda.
Mustaqillikning 35 yillik tarixiy solnomasi — bu xalqimizning bunyodkorlik salohiyati, matonati, birdamligi va kelajakka bo‘lgan yuksak ishonchi bilan chambarchas bog‘liq bo‘lgan ulkan taraqqiyot yo‘lidir. O‘tgan davr mobaynida mamlakatimizda inson qadrini ulug‘lash, fuqarolarning huquq va qonuniy manfaatlarini ta’minlash, aholi farovonligini oshirish, hududlarni kompleks rivojlantirish, zamonaviy infratuzilmani shakllantirish va jamiyat hayotining barcha jabhalarini izchil takomillashtirish borasida keng ko‘lamli islohotlar amalga oshirildi.
Bugun ana shu tarixiy taraqqiyot jarayonida o‘zining munosib hissasini qo‘shib kelayotgan fidoyi insonlarning mehnatini qadrlash va e’zozlash alohida ahamiyat kasb etadi.
Shu munosabat bilan viloyat hokimligi majlislar zalida “O‘zbekiston Respublikasi Mustaqilligining 35 yilligi” esdalik nishoni bilan taqdirlangan vohamiz faollari, nuroniylar, jamoatchilik vakillari hamda xalq deputatlari viloyat Kengashi deputatlariga mazkur yuksak e’tirofni tantanali ravishda topshirishga bag‘ishlangan marosim bo‘lib o‘tdi.
Tantanali tadbirda viloyat hokimi Murotjon Azimov ishtirok etib, Prezidentimiz nomlaridan “O‘zbekiston Respublikasi Mustaqilligining 35 yilligi” esdalik nishonlarini o‘z egalariga tantanali ravishda topshirdi.
Tadbirda ta’kidlanganidek, mazkur esdalik nishoni yurtimiz taraqqiyotiga munosib hissa qo‘shib kelayotgan, el-yurt manfaatlari yo‘lida fidokorona mehnat qilayotgan insonlarning xizmatlariga berilgan yuksak e’tibor va ehtiromning yorqin ifodasidir.
Ayniqsa, jamiyat hayotida faol ishtirok etib, aholi bilan yaqindan muloqot qilayotgan, fuqarolarning murojaat va takliflarini o‘rganish, ularning huquq va qonuniy manfaatlarini ta’minlash, ijtimoiy masalalarni hal etishga ko‘maklashish hamda hududlar rivojiga munosib hissa qo‘shayotgan faollar, deputatlar va jamoatchilik vakillarining faoliyati alohida e’tirofga loyiq.
Tantanali marosim davomida O‘zbekiston iste’molchilar huquqlarini himoya qilish jamiyatlari federatsiyasi Qashqadaryo viloyati hududiy birlashmasi raisi, Xalq deputatlari viloyat Kengashi deputati, iqtisod fanlari nomzodi, dotsent Shuhrat Xamidovich ham so‘zga chiqib, yig‘ilganlarni Mustaqilligimizning 35 yillik qutlug‘ sanasi bilan samimiy muborakbod etdi.
O‘z nutqida yurtimiz mustaqilligining tarixiy ahamiyati, istiqlol yillarida erishilgan ulkan yutuqlar, xalqimizning bunyodkorlik salohiyati hamda Vatan ravnaqi yo‘lida fidokorona mehnat qilayotgan yurtdoshlarimizning xizmatlari haqida iliq va samimiy fikrlar bildirdi.
Shuningdek, bugungi kunda mamlakatimizda inson manfaatlarini ta’minlash, fuqarolarning huquq va qonuniy manfaatlarini himoya qilish, aholi bilan ochiq va samarali muloqotni yo‘lga qo‘yish, jamoatchilik institutlarining jamiyat hayotidagi o‘rnini mustahkamlash borasida amalga oshirilayotgan izchil islohotlarning ahamiyatiga alohida to‘xtalib o‘tildi.
Qayd etilganidek, har bir sohada mas’uliyat bilan mehnat qilish, xalq ishonchini oqlash, Vatan manfaatlarini hamisha ustuvor bilish va jamiyat taraqqiyotiga munosib hissa qo‘shish — bugungi kunning muhim talabi va har bir fuqaroning ezgu burchidir.
Zero, yurt taraqqiyoti faqat yirik bunyodkorlik ishlari bilangina emas, balki har bir insonning o‘z vazifasiga vijdonan yondashishi, jamiyat hayotiga befarq bo‘lmasligi, xalq manfaatlari yo‘lida tashabbus ko‘rsatishi va ezgu maqsadlar sari hamjihatlik bilan harakat qilishi orqali ta’minlanadi.
Tadbirda so‘zga chiqqanlar tomonidan Mustaqillik yillarida erishilgan yutuqlarni yanada mustahkamlash, mamlakatimizning iqtisodiy va ijtimoiy salohiyatini oshirish, xalqimizning farovon hayotini ta’minlash, yosh avlodga munosib ta’lim va tarbiya berish, Vatanimizning xalqaro nufuzini yanada yuksaltirish yo‘lida oldinda turgan muhim vazifalar haqida fikr almashildi.
Shuningdek, bugungi tinch va osoyishta hayotimizni qadrlash, mamlakatimizdagi barqarorlik va totuvlikni asrash, yoshlar qalbida Vatanga muhabbat va sadoqat tuyg‘ularini mustahkamlash, milliy qadriyatlarimizni avaylab-asrash hamda kelajak avlodga obod va farovon yurt qoldirish har birimizning muqaddas burchimiz ekani ta’kidlandi.
Tantanali marosimda esdalik nishoniga munosib ko‘rilgan yurtdoshlarimiz o‘zlariga bildirilgan yuksak e’tibor va ishonchdan mamnun ekanliklarini bildirib, ushbu mukofot ular uchun katta sharaf bilan birga, kelgusida yanada mas’uliyat bilan mehnat qilishga undovchi muhim rag‘bat ekanini qayd etdilar.
Ular bundan buyon ham Vatanimiz taraqqiyoti, xalqimiz farovonligi, hududlar obodligi va jamiyatimiz ravnaqi yo‘lida bor bilim, tajriba va imkoniyatlarini safarbar etib, o‘z faoliyatlarida yuksak mas’uliyat va fidoyilik tamoyillariga amal qilishlarini bildirdilar.
Darhaqiqat, har qanday yuksak e’tirof ortida katta mehnat, izlanish, mas’uliyat va fidoyilik mujassam. Bugungi mukofot sohiblarining xizmatlari ham yurtimiz taraqqiyotining turli yo‘nalishlarida amalga oshirilayotgan ezgu ishlarning uzviy va munosib bir qismidir.
Bunday e’tirof, shubhasiz, nafaqat mukofot sohiblarini, balki barcha yurtdoshlarimizni yangi marralar sari intilish, ezgu tashabbuslarni hayotga tatbiq etish va Vatan ravnaqi yo‘lida yanada faol bo‘lishga ruhlantiradi.
Mustaqillikning 35 yillik qutlug‘ sanasi arafasida bunday yuksak e’tiroflarning o‘z egalariga topshirilishi xalqimizning Vatanga sadoqat bilan xizmat qilayotgan insonlarga bo‘lgan yuksak hurmati va e’tiborining yana bir yorqin ifodasidir.
“O‘zbekiston Respublikasi Mustaqilligining 35 yilligi” esdalik nishoni bilan taqdirlangan barcha yurtdoshlarimizni ushbu yuksak e’tirof bilan chin qalbimizdan samimiy muborakbod etamiz!
Ularga mustahkam sog‘lik-salomatlik, oilaviy xotirjamlik, uzoq umr, mas’uliyatli va sharafli faoliyatlarida ulkan zafarlar, yangi marralar hamda kelgusidagi ezgu tashabbuslarida muvaffaqiyatlar tilaymiz.
Yurtimiz tinch va osmonimiz musaffo, xonadonlarimiz obod va fayzli, xalqimiz hayoti farovon bo‘lsin!
Muqaddas va bebaho ne’matimiz — Mustaqilligimiz abadiy bo‘lsin!
O‘zbekistonimizning bugungi taraqqiyoti, ertangi buyuk kelajagi va xalqimiz farovonligi yo‘lidagi ezgu ishlarimiz bardavom bo‘lsin!
Mustaqilligimizning 35 yillik qutlug‘ ayyomi muborak bo‘lsin!
