Parkent tumanida O‘zbekiston iste’molchilar huquqlarini himoya qilish jamiyatlari Federatsiyasi tizimidagi Parkent tuman iste’molchilar huquqlarini himoya qilish jamiyati hisobot konferensiyasi o‘tkazildi. Hisobot konferensiyasi jamiyat faoliyatining muhim yo‘nalishlarini sarhisob qilish, amalga oshirilgan ishlarni muhokama etish, mavjud vazifalarni belgilash hamda iste’molchilar huquqlarini himoya qilish borasidagi faoliyatni yanada takomillashtirishga qaratildi. O‘zbekiston iste’molchilar huquqlarini himoya qilish jamiyatlari Federatsiyasi Ustaviga ko‘ra, Federatsiyaning oliy boshqaruv organi Konferensiya hisoblanadi. Konferensiyani chaqirish, tashkil etish va o‘tkazish tartibi Federatsiya Ustavi hamda Federatsiya Kengashi tomonidan tasdiqlanadigan Konferensiya to‘g‘risidagi nizom asosida belgilanadi. Navbatdagi hisobot Konferensiyasi besh yilda kamida bir marotaba chaqirilishi belgilangan. Hisobot konferensiyalarining asosiy maqsadi tashkilot va uning hududiy bo‘g‘inlarida amalga oshirilgan ishlarni atroflicha ko‘rib chiqish, faoliyat samaradorligini muhokama qilish hamda kelgusidagi ustuvor vazifalarni belgilashdan iborat. Konferensiya davomida jamiyatning hisobot davridagi faoliyati, iste’molchilar murojaatlari bilan ishlash, ularning buzilgan huquqlarini tiklash, jamoatchilik nazorati tartibida o‘rganishlar olib borish, aholining huquqiy savodxonligini oshirishga qaratilgan targ‘ibot-tushuntirish tadbirlari kabi yo‘nalishlarga e’tibor qaratildi. Iste’molchilar huquqlarini himoya qilish tizimida fuqarolardan kelib tushayotgan murojaatlarni o‘z vaqtida ko‘rib chiqish, ularning qonuniy manfaatlarini himoya qilish va muammolariga amaliy yechim topish muhim vazifalardan biri hisoblanadi. Shu bois konferensiyada murojaatlar bilan ishlash samaradorligini oshirish, iste’molchilarga huquqiy ko‘mak ko‘rsatish va ularning manfaatlarini himoya qilish borasidagi ishlarni izchil davom ettirish masalalariga ham alohida ahamiyat berildi. Shuningdek, iste’molchilarning huquq va manfaatlarini ta’minlash faqatgina murojaatlarni ko‘rib chiqish bilan cheklanmasdan, aholining huquqiy bilimlarini oshirish, tadbirkorlik subyektlari o‘rtasida iste’molchilarga qonunchilikda belgilangan talablar asosida xizmat ko‘rsatish madaniyatini shakllantirish, savdo va xizmat ko‘rsatish sohalarida jamoatchilik nazorati tartibida o‘rganishlar olib borish hamda aniqlangan masalalar yuzasidan tegishli choralarni ko‘rishni ham taqozo etadi. Federatsiya Ustavida Konferensiya vakolatlari doirasida tashkilot Ustavini tasdiqlash va unga qo‘shimcha hamda o‘zgartirishlar kiritish, Federatsiyani qayta tashkil etish yoki faoliyatini tugatish bilan bog‘liq masalalarni ko‘rib chiqish, Federatsiya Kengashi a’zolarini saylash va ularning vakolatlarini muddatidan ilgari tugatish, nazorat-taftish komissiyasi a’zolarini saylash hamda rahbar organlarning hisobotlarini muhokama qilish va tasdiqlash kabi muhim masalalar belgilangan. Bundan tashqari, Konferensiya Federatsiya faoliyatining keyingi besh yillik asosiy yo‘nalishlarini belgilash, mol-mulkni tashkil etish va undan foydalanish tamoyillarini belgilash, Konferensiya reglamentini tasdiqlash hamda qonunchilik va Ustav doirasidagi boshqa masalalar yuzasidan qarorlar qabul qilish vakolatiga ega. Mazkur tartibdan ko‘rinib turibdiki, hisobot konferensiyalari tashkilot faoliyatini tahlil qilish bilan bir qatorda, kelgusidagi ishlarni aniq rejalashtirish va iste’molchilar huquqlarini himoya qilish tizimini yanada takomillashtirish uchun muhim tashkiliy maydon hisoblanadi. Konferensiyada kelgusida Parkent tumanida iste’molchilarning huquqiy xabardorligini oshirish, aholi bilan ochiq muloqotni kuchaytirish, murojaatlar bilan ishlash samaradorligini yanada oshirish, iste’molchilar huquqlarini himoya qilishga qaratilgan targ‘ibot tadbirlarini kengaytirish hamda jamoatchilik nazorati tartibidagi o‘rganishlarni tizimli davom ettirishga alohida e’tibor qaratish zarurligi qayd etildi.
Shuningdek, jamiyatning hududdagi faoliyatini yanada kuchaytirish, aholi uchun iste’molchilar huquqlarini himoya qilish sohasidagi mavjud imkoniyatlar va murojaat qilish tartiblari haqida tushuntirish ishlarini muntazam olib borish muhimligi ta’kidlandi. Konferensiyada tayanch guruhlari faoliyatining o‘rni ham e’tirof etildi. Faoliyatida tashabbuskorlik ko‘rsatib, iste’molchilarning huquqiy manfaatlarini himoya qilish, aholining huquqiy savodxonligini oshirish va jamoatchilik bilan ishlashga munosib hissa qo‘shib kelayotgan tayanch guruhlari rahbarlariga esdalik sovg‘alari topshirildi. Umuman, Parkent tumanidagi hisobot konferensiyasi jamiyatning amalga oshirilgan ishlarini sarhisob qilish, mavjud vazifalarni muhokama etish va iste’molchilar huquqlarini himoya qilish yo‘nalishidagi faoliyatni kelgusida yanada takomillashtirishga qaratilgan muhim tadbirlardan biri bo‘ldi. Konferensiyada belgilangan vazifalar hududda iste’molchilarning huquq va qonuniy manfaatlarini himoya qilish, ularning murojaatlariga amaliy ko‘mak ko‘rsatish hamda aholining iste’molchi sifatidagi huquqiy bilimlarini oshirishga qaratilgan ishlarni izchil davom ettirishga xizmat qiladi.
Toshkent viloyati iste’molchilar huquqlarini himoya qilish jamiyatlari hududiy birlashmasi matbuot xizmati
