Sariosiyo tumanida tuxum mahsuloti sifati bilan bog‘liq iste’molchi murojaati o‘rganilib, fuqaroning qonuniy manfaatlari tiklandi.
Sariosiyo tumani “Do‘stlik” mahallasida yashovchi fuqaro Sh.R. tumandagi savdo shoxobchalari biridan 20 quti tuxum mahsulotini 700 000 so‘mga xarid qilgan. Biroq mahsulotdan foydalanish jarayonida tuxumlarning iste’molga yaroqsiz holatda ekani ma’lum bo‘lgan. Bu holat iste’molchining haqli e’tiroziga sabab bo‘lgan.
Fuqaro mazkur masala yuzasidan Sariosiyo tuman Iste’molchilar huquqlarini himoya qilish jamiyatiga murojaat qilgan. Murojaat belgilangan tartibda qabul qilinib, jamiyat xodimlari tomonidan atroflicha o‘rganildi.
O‘rganish jarayonida fuqaroning murojaatida ko‘rsatilgan holatlar, xarid qilingan mahsulot sifati hamda savdo jarayoni bilan bog‘liq jihatlar tahlil qilindi.
Tekshiruv davomida iste’molchi tomonidan xarid qilingan tuxum mahsulotida haqiqatan ham sifat bilan bog‘liq e’tirozli holat mavjudligi aniqlandi. Jamiyat xodimlari tomonidan tomonlarga amaldagi qonunchilik talablari, iste’molchining sifatli va xavfsiz mahsulot xarid qilish huquqi hamda sotuvchining majburiyatlari tushuntirildi.
Olib borilgan amaliy ishlar natijasida iste’molchi tomonidan xarid qilingan sifatsiz tuxum mahsuloti sotuvchiga qaytarildi. Sotuvchi tomonidan esa fuqaroga 700 000 so‘m miqdoridagi mablag‘ to‘liq qaytarib berildi.
Shu tariqa iste’molchining murojaati ijobiy hal etilib, uning buzilgan huquqi tiklandi.
Mazkur holat har bir iste’molchi oziq-ovqat mahsulotlarini xarid qilishda mahsulot sifati, saqlash sharoiti, yaroqlilik muddati va to‘lov hujjatlariga alohida e’tibor qaratishi zarurligini yana bir bor ko‘rsatadi. Agar xarid qilingan mahsulot sifatsiz yoki iste’molga yaroqsiz bo‘lib chiqsa, iste’molchi uni almashtirish, to‘langan mablag‘ni qaytarish yoki boshqa qonuniy talablar bilan murojaat qilish huquqiga ega.
Sariosiyo tuman Iste’molchilar huquqlarini himoya qilish jamiyati tomonidan fuqarolarning murojaatlarini o‘z vaqtida o‘rganish, iste’molchilarning qonuniy huquq va manfaatlarini himoya qilish borasidagi ishlar izchil davom ettirilmoqda.
Sizning ham iste’molchi sifatidagi huquqlaringiz buzildimi? 1091 qisqa raqamiga qo‘ng‘iroq qiling!
O‘zbekiston iste’molchilar huquqlarini himoya qilish jamiyatlari federatsiyasi
Surxondaryo viloyati hududiy birlashmasi Axborot xizmati
