Mamlakatimizda yuridik taʼlim sifatini oshirish, yuqori malakali huquqshunos kadrlar tayyorlash hamda isteʼmolchilar huquqlarini himoya qilish tizimini takomillashtirishga qaratilgan hamkorlik izchil rivojlanmoqda.
Shu maqsadda Toshkent davlat yuridik universiteti hamda Oʼzbekiston isteʼmolchilar huquqlarini himoya qilish jamiyatlari federatsiyasi oʼrtasida 2026 yil 13 aprelь kuni imzolangan hamkorlik memorandumi va uni amalga oshirish boʼyicha tasdiqlangan “Yoʼl xaritasi” doirasida qator amaliy loyihalar hayotga tatbiq etilmoqda.
Tadbirda Federatsiya raisi Jahongir Sarimsoqov hamda Toshkent davlat yuridik universiteti rektori Baxshillo Xodjaev ishtirok etdi.
Taʼkidlanganidek, mazkur tashabbus taʼlim, ilm-fan va amaliyot integratsiyasini mustahkamlash, talabalarning amaliy tayyorgarligini oshirish, sohada ilmiy tadqiqotlarni rivojlantirish va zamonaviy talablarga javob beradigan huquqshunos kadrlarni tayyorlashda muhim ahamiyat kasb etadi.
Jumladan, 2026 yil 23 iyundan 25 avgustga qadar universitetning 189 nafar talabasi Federatsiyaning hududiy birlashmalari hamda tuman (shahar) jamiyatlarida yozgi stajirovka oʼtamoqda. Unda talabalar murojaatlar bilan ishlash, mediatsiya, sud-daʼvo ishlarini yuritish, huquqiy targʼibot va isteʼmolchilar huquqlarini himoya qilish sohasidagi boshqa yoʼnalishlarda nazariy bilimlarini amaliy faoliyat bilan mustahkamlamoqda.
Memorandum ijrosining muhim natijalaridan biri sifatida 2026 yil 6 iyulь kuni Oʼzbekiston isteʼmolchilar huquqlarini himoya qilish jamiyatlari federatsiyasi huzurida Toshkent davlat yuridik universiteti Biznes huquqi va sud himoyasi fakulьteti Аkademik departamenti shoʼʼbasining tantanali ochilish marosimi boʼlib oʼtdi.
Аkademik departament shoʼʼbasi isteʼmolchilar huquqlarini himoya qilish sohasidagi fuqarolik-huquqiy munosabatlarni ilmiy va amaliy jihatdan oʼrganish, talabalarning kasbiy koʼnikmalarini rivojlantirish, huquqiy targʼibot ishlarini kuchaytirish hamda ilmiy-tahliliy tadqiqotlarni amalga oshirishga xizmat qiladi.
Shoʼʼba doirasida murojaatlarni koʼrib chiqish, shartnomaviy nizolarni hal etish, sudgacha kelishuv va mediatsiya jarayonlari, sud-daʼvo amaliyoti, qonunchilik ijrosini tahlil qilish, shuningdek, huquqni qoʼllash amaliyotini takomillashtirishga oid ilmiy-amaliy takliflar ishlab chiqish rejalashtirilgan.
Shuningdek, universitet professor-oʼqituvchilari, talabalar va Federatsiya mutaxassislari ishtirokida klinik seminarlar, amaliy keyslar tahlili, davra suhbatlari hamda huquqiy targʼibot tadbirlari muntazam oʼtkaziladi. Taʼlim jarayoniga amaliy oʼqitish, stajirovka va dual taʼlim elementlarini keng joriy etish, oʼquv dasturlarini soha ehtiyojlari asosida takomillashtirish ham shoʼʼbaning ustuvor vazifalari hisoblanadi.
Mazkur tashabbus yuridik taʼlim va huquqni qoʼllash amaliyoti oʼrtasidagi oʼzaro integratsiyani yanada mustahkamlash, raqobatbardosh va yuqori malakali huquqshunos kadrlar tayyorlash, shuningdek, mamlakatimizda isteʼmolchilar huquqlarini himoya qilish tizimini yanada rivojlantirishga xizmat qiladi.
