Bugungi kunda internet xizmati aholining kundalik hayoti, ta’lim olishi, mehnat faoliyati, davlat xizmatlaridan foydalanishi va axborot almashinuvida muhim o‘rin tutadi. Shu sababli internet tarmog‘ining barqaror va sifatli ishlashi, yuzaga kelgan texnik nosozliklarning o‘z vaqtida bartaraf etilishi iste’molchilar manfaatlarini ta’minlashning muhim shartlaridan biridir.
Sariosiyo tumanida internet xizmati sifati bilan bog‘liq navbatdagi murojaat amaliy hamkorlik asosida o‘rganilib, ijobiy hal etildi.
Sariosiyo tumani Alisher Navoiy mahallasida istiqomat qiluvchi fuqaro Abduraximov Mamarajab Sariosiyo tuman Iste’molchilar huquqlarini himoya qilish jamiyatiga og‘zaki murojaat qilgan. Murojaatda fuqaro xonadonidagi Wi-Fi tarmog‘i qariyb bir oy davomida talab darajasida ishlamayotgani, bu holat kundalik hayotida noqulaylik tug‘dirayotganini bildirib, muammoni o‘rganish va amaliy yordam ko‘rsatishni so‘ragan.
Fuqaroning murojaati Sariosiyo tuman Iste’molchilar huquqlarini himoya qilish jamiyatining huquqiy himoya va murojaatlar bilan ishlash bo‘yicha inspektori M.O‘lmasov, “O‘zbektelekom” AK Janubiy filiali Sariosiyo uchastkasi xodimi I.Xayitov hamda murojaatchining bevosita ishtirokida o‘rganildi. Dastlab xizmat ko‘rsatuvchi tashkilot mas’ullari bilan bog‘lanilib, internet tarmog‘ining qariyb bir oydan buyon yaxshi ishlamayotganiga aniqlik kiritildi. Shundan so‘ng mutaxassislar fuqaroning xonadoniga chiqib, Wi-Fi tarmog‘ining texnik holatini atroflicha tekshirdi. O‘rganish jarayonida mavjud kamchiliklar aniqlanib, ularni bartaraf etish yuzasidan tegishli choralar ko‘rildi. Natijada fuqaroning xonadonidagi Wi-Fi tarmog‘i faol holatga keltirilib, internet xizmatidan to‘laqonli foydalanish imkoniyati tiklandi.
Mazkur holatga faqat oddiy texnik nosozlik sifatida qarash yetarli emas. Chunki internet tarmog‘ining uzoq vaqt davomida yaxshi ishlamasligi fuqaroning ta’lim, mehnat, aloqa va elektron xizmatlardan foydalanish imkoniyatiga salbiy ta’sir ko‘rsatishi mumkin. Bugungi kunda internet orqali davlat xizmatlaridan foydalaniladi, bank va to‘lov amaliyotlari bajariladi, o‘quvchi va talabalar ta’lim oladi, tadbirkorlar o‘z faoliyatini yuritadi hamda fuqarolar zarur axborot va xizmatlarga ega bo‘ladi. Shu sababli internetdagi uzoq muddatli uzilish yoki xizmat sifatining pasayishi iste’molchining vaqtini yo‘qotishi, qo‘shimcha xarajatlarga duch kelishi va muhim imkoniyatlardan foydalana olmasligiga sabab bo‘lishi mumkin. Xizmat ko‘rsatuvchi tashkilotlar murojaatlarga tezkor munosabat bildirishi, nosozlik sabablarini aniqlashi va muammoni asossiz ravishda cho‘zmasdan bartaraf etishi lozim.
MUROJAAT — XIZMAT SIFATINI YAXSHILASH OMILI
Ayrim fuqarolar internet xizmatidagi nosozlik yuzasidan murojaat qilishdan foyda yo‘q, degan noto‘g‘ri fikrga ega bo‘lishi mumkin. Aslida esa murojaat xizmat ko‘rsatish tizimidagi mavjud kamchilikni ko‘rsatib beruvchi muhim signal hisoblanadi.
Har bir murojaatni o‘z vaqtida o‘rganish texnik muammolarni aniqlash, xizmat sifatini yaxshilash, mas’ul tashkilotlarning javobgarligini oshirish, o‘xshash kamchiliklarning takrorlanishiga yo‘l qo‘ymaslik hamda iste’molchi va xizmat ko‘rsatuvchi o‘rtasidagi ishonchni mustahkamlashga xizmat qiladi.
Sariosiyo tumanidagi ushbu holatda ham murojaat mutaxassislar ishtirokida joyiga chiqib o‘rganilgani va muammo amalda bartaraf etilgani muhim natija bo‘ldi.
AMALIY HAMKORLIK — IJOBIY NATIJANING ASOSI
Iste’molchilar huquqlarini himoya qilishda murojaatni ro‘yxatga olish yoki xizmat ko‘rsatuvchi tashkilotga yuborishning o‘zi yetarli emas. Eng asosiy mezon — iste’molchining buzilgan manfaatini amalda tiklashdir.
Mazkur holatda Sariosiyo tuman Iste’molchilar huquqlarini himoya qilish jamiyati hamda “O‘zbektelekom” AK Janubiy filiali Sariosiyo uchastkasi xodimlarining hamkorligi natijasida internet tarmog‘idagi muammo bartaraf etildi.
Bu esa iste’molchilar murojaatlarini hal etishda tezkorlik, joyiga chiqib o‘rganish va tashkilotlararo hamkorlik muhim ahamiyatga ega ekanini yana bir bor ko‘rsatdi.
Iste’molchi murojaati faqat eshitilishi bilan emas, amaliy yechim topishi bilan ahamiyatlidir.
Sizning ham iste’molchi sifatidagi huquqlaringiz buzildimi?
☎️ 1091 qisqa raqamiga qo‘ng‘iroq qiling!
O‘zbekiston iste’molchilar huquqlarini himoya qilish jamiyatlari federatsiyasi
Surxondaryo viloyati hududiy birlashmasi Axborot xizmati
