Aholiga sanitar tozalash xizmatlari ko‘rsatishda hisob-kitoblarning haqqoniyligi va shaffofligini ta’minlash, iste’molchilarning huquq hamda qonuniy manfaatlarini himoya qilish muhim vazifalardan biridir.
Shu maqsadda Andijon viloyati iste’molchilar huquqlarini himoya qilish boshqarmasi mas’ullari tomonidan aholi abonentlari o‘rtasida o‘tkazilgan xatlovlar davomida sanitar tozalash xizmatlari bo‘yicha hisoblangan qarzdorliklar o‘rganildi. Xatlovlar natijasida 2026-yil iyul oyida 400 million so‘m, avgust oyida esa 950 million so‘m, jami 1 milliard 350 million so‘mlik noreal qarzdorlik aniqlanib, iste’molchilar zimmasidan chiqarildi hamda “Toza Makon” elektron billing tizimidan qisqartirildi.
— Iste’molchilarga ko‘rsatilayotgan xizmatlar bo‘yicha hisob-kitoblar aniq, asosli va shaffof yuritilishi lozim. Aniqlangan noreal qarzdorliklarning iste’molchilar zimmasidan chiqarilishi va “Toza Makon” elektron billing tizimidan qisqartirilishi fuqarolarning qonuniy manfaatlarini ta’minlashga xizmat qiladi. Bu boradagi o‘rganishlar izchil davom ettiriladi, — deydi Chiqindilarni boshqarish va sirkulyar iqtisodiyotni rivojlantirish agentligining Andijon viloyati boshqarmasi boshlig‘i Sh. Nishanov.
Mazkur natija iste’molchilar murojaatlarini o‘rganish va jamoatchilik nazoratini amalga oshirish orqali muammolarni aniqlash hamda ularni qonuniy tartibda bartaraf etish mumkinligini ko‘rsatmoqda. Iste’molchi zimmasiga faqat haqiqatan ko‘rsatilgan xizmat va qonuniy asosga ega hisob-kitoblar bo‘yicha majburiyat yuklanishi lozim. Shu bois sanitar tozalash xizmatlari bo‘yicha hisob-kitoblarning haqqoniyligi, shaffofligi va qonuniyligini ta’minlashga qaratilgan nazorat tadbirlari davom ettirilmoqda.
