Bo'stonliq tumanida murojaat ortidan muammo yechim topdi

Iste’molchining murojaati joyida o‘rganilib, suv oqimiga to‘sqinlik qilayotgan holatlar bartaraf etildi
Bugungi kunda aholining munosib turmush sharoitini ta’minlashda kommunal xizmatlarning sifati muhim o‘rin tutadi. Suv ta’minoti, oqova tizimi, obodonlashtirish va hududlardagi infratuzilma bilan bog‘liq muammolar esa o‘z vaqtida e’tibor va amaliy yondashuvni talab etadi.
Shunday masalalardan biri bo‘yicha fuqaro Muratov Saidvali Saidnabievich O‘zbekiston iste’molchilar huquqlarini himoya qilish jamiyatlari federatsiyasining 1091 ishonch telefoniga murojaat qildi.
Fuqaro murojaatida Bo‘stonliq tumani Qo‘shqo‘rg‘on hududi, Xo‘jaobod MFY, Veteran Arancha dala hovlilari joylashgan mahalla hududida suv to‘planib qolayotgani, suv oqova tizimi bilan bog‘liq muammo yuzaga kelgani va uni bartaraf etishda amaliy yordam so‘ragan.
Muammo joyida o‘rganildi
Murojaat Toshkent viloyati iste’molchilar huquqlarini himoya qilish jamiyatlari hududiy birlashmasining Bo‘stonliq tumani jamiyati tomonidan o‘rganildi. Masalaga oydinlik kiritish maqsadida mutasaddilar hududga chiqib, holatni joyida ko‘zdan kechirdilar.
O‘rganish davomida murojaatda ko‘rsatilgan hududdagi yo‘l, ariq-zovurlar va suvning oqib o‘tish holati ko‘rib chiqildi. Shu hududda yashovchi fuqarolar bilan ham suhbatlashilib, muammoning kelib chiqish sabablari aniqlandi.
Ma’lum bo‘lishicha, yo‘l yoqasidagi ayrim ariq-zovurlar o‘simliklar va chiqindilar bilan to‘lib qolgan. Bundan tashqari, “Eko Orol” dam olish maskani tomonidan ariq ustiga suv oqimi uchun mos bo‘lmagan kichik hajmdagi metall truba o‘rnatilgan.
Mazkur holat suvning erkin oqib o‘tishiga to‘sqinlik qilgan.
Aniqlangan kamchiliklar bartaraf etildi
O‘rganish natijasida aniqlangan muammolarni bartaraf etish bo‘yicha tegishli choralar ko‘rildi.
Jumladan, “Eko Orol” dam olish maskani rahbariyati tomonidan ariq ustiga qurilgan ko‘prik buzib tashlandi, suv oqimiga mos kelmaydigan metall truba olib tashlandi. Shuningdek, suvning erkin harakatlanishini ta’minlash maqsadida ariq-zovurning tegishli qismi kengaytirilib, 2 metrli ariq zovuri holati yaxshilandi.
Hududdagi ariq-zovurlarni tozalash va obodonlashtirish ishlari bo‘yicha esa mahalladagi dala hovli egalari birgalikda hashar tashkil etib, tegishli ishlarni amalga oshirishni o‘z zimmalariga oldilar.
Shunday qilib, fuqaroning murojaatida ko‘tarilgan masala faqat qog‘ozdagi javob bilan cheklanib qolmadi. Muammo joyiga chiqib o‘rganildi, uning kelib chiqish sabablari aniqlandi va amaliy choralar ko‘rildi.
Murojaat — muammoni hal etishning muhim vositasi
Mazkur holat fuqarolarning o‘z huquqlarini bilishi va muammo yuzaga kelganda tegishli tashkilotlarga murojaat qilishi naqadar muhim ekanini ko‘rsatadi.
Iste’molchi faqat do‘kondan mahsulot xarid qiluvchi shaxs emas. Kommunal, transport, aloqa, tibbiy, maishiy va boshqa xizmatlardan foydalanuvchi har bir fuqaro ham iste’molchi hisoblanadi. Demak, xizmat sifati bilan bog‘liq muammoga duch kelgan fuqaro o‘z manfaatlarini himoya qilishga haqli.
Toshkent viloyati iste’molchilar huquqlarini himoya qilish jamiyatlari hududiy birlashmasi tomonidan fuqarolarning murojaatlarini o‘rganish, ularning qonuniy manfaatlarini himoya qilish va muammolarni amaliy hal etishga ko‘maklashish ishlari izchil davom ettirilmoqda.
Bir murojaat ortidan muammo aniqlandi. Muammo aniqlandi — yechim topildi.
Agar siz ham iste’molchi sifatida huquqlaringiz buzilganiga duch kelsangiz, murojaatingizni e’tiborsiz qoldirmang.
1091 — Iste’molchilar huquqlarini himoya qilish bo‘yicha ishonch telefoni.
murojaat.istemol.uz — onlayn murojaat yo‘llash imkoniyati.
Muammoni yashirish emas, uni qonuniy yo‘l bilan hal etish — har bir iste’molchining huquqi.