Uy ta'mirlash yoki qurilish ishlari har bir oila hayotidagi muhim jarayonlardan biridir. Inson yillar davomida mablag' yig'adi, uyini chiroyli va zamonaviy qilishni orzu qiladi. Biroq ayrim hollarda bu orzu ortidan ko'ngilsizliklar boshlanadi.
Ijtimoiy tarmoqlarda chiroyli suratlar va videolar joylashtirgan ustalar yoki qurilish brigadalari qisqa muddatda va sifatli ta'mirni va'da qiladi. Buyurtmachi ishni tezroq boshlash ilinjida oldindan pul to'laydi. Ammo vaqt o'tgani sayin bahonalar ko'payadi.
"Material kechikdi."
"Ishchilar kelmadi."
"Ertaga albatta tugatamiz."
Shu tariqa bir haftalik ish bir oyga, ba'zan esa bir necha oyga cho'ziladi.
Eng achinarlisi, ayrim fuqarolar ishni hech qanday yozma shartnomasiz boshlaydi. Barcha kelishuvlar og'zaki bo'ladi. Muammo kelib chiqqanda esa kim nima va'da berganini isbotlash qiyinlashadi.
Bugungi kunda iste'molchilar tomonidan bildirilayotgan e'tirozlarning bir qismi aynan sifatsiz ta'mirlash ishlari, kelishilgan muddatga amal qilinmasligi va bajarilgan ish sifati bilan bog'liq.
Aslida har qanday pullik xizmat ko'rsatishda buyurtmachi ham iste'molchi hisoblanadi. Demak, u sifatli xizmat olish, xizmat shartlari haqida to'liq ma'lumotga ega bo'lish va kelishilgan muddatda ishning bajarilishini kutishga haqli.
Mutaxassislar uy ta'mirlash ishlarini boshlashdan oldin bir nechta muhim qoidalarga amal qilishni tavsiya etadi. Avvalo, bajariladigan ishlar hajmi, narxi, muddati va tomonlarning majburiyatlari yozma ravishda rasmiylashtirilishi maqsadga muvofiq. To'lovni tasdiqlovchi hujjatlar, yozishmalar va smetani saqlash ham keyinchalik yuzaga kelishi mumkin bo'lgan nizolarni hal etishda muhim ahamiyatga ega.
Yana bir muhim jihat shundaki, eng arzon taklif har doim ham eng yaxshi tanlov emas. Ba'zan tajribasiz yoki mas'uliyatsiz ustani tanlash keyinchalik qo'shimcha xarajatlar va ortiqcha vaqt yo'qotilishiga sabab bo'ladi.
Bugun xizmat ko'rsatish sifati faqat narx bilan emas, mas'uliyat va halollik bilan ham baholanadi. Va'da berish oson, ammo uni bajarish tadbirkorning obro'sini belgilaydi.
Xulosa
Uy ta'miri faqat devorlarni emas, insonning kayfiyati va ishonchini ham o'zgartiradi.
Shu sababli har qanday xizmatni tanlashda shoshilmaslik, hujjatlarni rasmiylashtirish va o'z huquqlarini bilish iste'molchining eng ishonchli himoyasidir.
Halol xizmat — ishonchli hamkorlikning, huquqiy savodxonlik esa iste'molchi manfaatlarini himoya qilishning eng muhim omilidir.
Muallif: Rano Abdullayeva
Toshkent viloyati Iste'molchilar huquqlarini himoya qilish jamiyatlari hududiy birlashmasi matbuot rahbari
