Oltinsoy tumanida yashovchi fuqaroning elektr energiyasi ta’minoti bilan bog‘liq og‘zaki murojaati o‘rganilib, iste’molchining qonuniy manfaatlarini himoya qilish yuzasidan amaliy yordam ko‘rsatildi.
Oltinsoy tumani Qumayqal mahallasi Do‘stlik ko‘chasida yashovchi fuqaro B.K. xonadonida elektr energiyasidan foydalanishda yuzaga kelgan muammo sababli O‘zbekiston iste’molchilar huquqlarini himoya qilish jamiyatlari federatsiyasining 1091 ishonch telefoniga og‘zaki murojaat qilgan.
Murojaatda fuqaro xonadonida elektr energiyasi o‘z vaqtida yetkazib berilmayotgani, mazkur holat kundalik turmush tarzida noqulaylik tug‘dirayotganini bildirgan. Ushbu holat iste’molchining haqli e’tiroziga sabab bo‘lgan.
Mazkur og‘zaki murojaat belgilangan tartibda Oltinsoy tuman Iste’molchilar huquqlarini himoya qilish jamiyatiga yuborilib, tuman jamiyati rahbari D.Qo‘shoqova boshchiligida o‘rganish ishlari olib borildi.
O‘rganish jarayonida murojaatda ko‘rsatilgan holatlar, xonadondagi elektr energiyasi ta’minoti bilan bog‘liq muammo, elektr tarmog‘iga ulanish va xizmat ko‘rsatish holati atroflicha ko‘rib chiqildi. Shuningdek, masala yuzasidan tuman Elektr energiyasi savdo bo‘limi rahbari B.Allayorov bilan hamkorlikda o‘rganish ishlari amalga oshirildi.
Olib borilgan amaliy choralar natijasida fuqaro B.K.ning xonadonidagi elektr energiyasi ta’minoti bilan bog‘liq muammo bartaraf etildi. Shu tariqa iste’molchining og‘zaki murojaati ijobiy hal etilib, uning qonuniy manfaatlari himoya qilindi.
Murojaati ijobiy yechim topgan fuqaro B.K. Oltinsoy tuman Iste’molchilar huquqlarini himoya qilish jamiyati rahbariyati va xodimlariga minnatdorlik bildirdi.
Mazkur holat kommunal xizmatlardan foydalanishda iste’molchilarning huquqlarini o‘z vaqtida himoya qilish, murojaatlarni e’tiborsiz qoldirmaslik va mutasaddi tashkilotlar bilan hamkorlikda muammolarga amaliy yechim topish muhim ahamiyatga ega ekanini yana bir bor ko‘rsatadi.
Elektr energiyasi aholining kundalik hayoti, maishiy sharoiti va turmush farovonligi bilan bevosita bog‘liq muhim xizmat turi hisoblanadi. Shu bois ushbu yo‘nalishdagi har bir murojaatga mas’uliyat bilan yondashish, muammolarni o‘z vaqtida o‘rganish va qonuniy tartibda hal etish iste’molchilar manfaatlarini ta’minlashda muhim o‘rin tutadi.
Agar fuqaro kommunal xizmatlar, jumladan, elektr energiyasi ta’minoti, gaz, suv, chiqindi yoki boshqa xizmatlardan foydalanish jarayonida muammoga duch kelsa, u belgilangan tartibda tegishli tashkilotlarga yoki iste’molchilar huquqlarini himoya qilish jamiyatlariga murojaat qilish huquqiga ega.
Oltinsoy tuman Iste’molchilar huquqlarini himoya qilish jamiyati tomonidan fuqarolarning og‘zaki va yozma murojaatlarini o‘z vaqtida ko‘rib chiqish, iste’molchilarning qonuniy huquq va manfaatlarini himoya qilish hamda kommunal xizmatlar sohasida yuzaga kelayotgan masalalarni hal etish borasidagi ishlar izchil davom ettirilmoqda.
Sizning ham iste’molchi sifatidagi huquqlaringiz buzildimi?
1091 qisqa raqamiga qo‘ng‘iroq qiling!
O‘zbekiston iste’molchilar huquqlarini himoya qilish jamiyatlari federatsiyasi
Surxondaryo viloyati hududiy birlashmasi Axborot xizmati
