Termiz shahrida iste’molchi tomonidan xarid qilingan mobil telefon bilan bog‘liq murojaat o‘rganilib, fuqaroning qonuniy manfaatlarini himoya qilish yuzasidan amaliy yordam ko‘rsatildi.
Termiz shahar O‘zbekiston mahallasi, A.Navoiy ko‘chasida yashovchi fuqaro L.R. O‘zbekiston iste’molchilar huquqlarini himoya qilish jamiyatlari federatsiyasining 1091 ishonch telefoni orqali murojaat qilib, yangi xarid qilingan mobil telefoni bilan bog‘liq muammo yuzasidan amaliy yordam so‘ragan.
Murojaatda fuqaro joriy yil yanvar oyida xarid qilingan telefonidan foydalanish jarayonida qurilma qizib ketayotgani, ushbu holat yuzasidan servis xizmatiga murojaat qilganida esa telefonni ta’mirlash o‘rniga faqat ayrim dasturlar o‘rnatib berilayotgani va asosiy muammo bartaraf etilmayotganidan norozi ekanini bildirgan.
Mazkur holat iste’molchining haqli e’tiroziga sabab bo‘lgan. Chunki mobil telefon kundalik hayotda aloqa, axborot almashish, ish faoliyati va turli xizmatlardan foydalanishda muhim vosita hisoblanadi. Xarid qilingan mahsulotning nosoz ishlashi esa iste’molchiga noqulaylik tug‘diradi va uning sifatli mahsulotdan foydalanish huquqiga bevosita ta’sir ko‘rsatadi.
Murojaat belgilangan tartibda Termiz shahar Iste’molchilar huquqlarini himoya qilish jamiyati tomonidan qabul qilinib, mas’ul xodimlar tomonidan o‘rganish ishlari olib borildi. O‘rganish jarayonida fuqaroning vajlari, telefonning holati, servis xizmati tomonidan ko‘rsatilgan xizmatlar hamda murojaatda qayd etilgan boshqa holatlar atroflicha ko‘rib chiqildi.
Jamiyat xodimlari tomonidan tegishli tomonlar bilan muloqot o‘tkazilib, iste’molchining qonuniy huquqlari, sifatli mahsulot xarid qilish huquqi, kafolat muddati davomida aniqlangan nuqsonlarni bartaraf etish tartibi hamda xizmat ko‘rsatuvchi subyektlarning majburiyatlari yuzasidan tushuntirish ishlari olib borildi.
O‘rganish natijasida murojaatda ko‘rsatilgan holatlar inobatga olinib, masala iste’molchi manfaatlari asosida ijobiy hal etildi. Fuqaroning telefon bilan bog‘liq muammosi yuzasidan amaliy yordam ko‘rsatilib, uning qonuniy talabi qanoatlantirildi.
Mazkur holat mobil telefon, maishiy texnika yoki boshqa kafolatli mahsulotlarni xarid qilishda iste’molchilar mahsulot sifati, kafolat muddati, servis xizmati shartlari, to‘lov hujjati hamda kafolat taloniga alohida e’tibor qaratishi zarurligini yana bir bor ko‘rsatadi.
Agar xarid qilingan mahsulotda kafolat muddati davomida nuqson aniqlansa, iste’molchi belgilangan tartibda mahsulotni bepul ta’mirlash, almashtirish, narxini kamaytirish yoki to‘langan mablag‘ni qaytarishni talab qilish huquqiga ega.
Termiz shahar Iste’molchilar huquqlarini himoya qilish jamiyati tomonidan fuqarolarning og‘zaki, yozma va elektron murojaatlarini o‘z vaqtida ko‘rib chiqish, iste’molchilarning qonuniy huquq va manfaatlarini himoya qilish hamda servis xizmatlari sohasida yuzaga kelayotgan muammolarga qonuniy yechim topish borasidagi ishlar izchil davom ettirilmoqda.
Sizning ham iste’molchi sifatidagi huquqlaringiz buzildimi?
1091 qisqa raqamiga qo‘ng‘iroq qiling!
O‘zbekiston iste’molchilar huquqlarini himoya qilish jamiyatlari federatsiyasi
Surxondaryo viloyati hududiy birlashmasi Axborot xizmati
